ЛАНЬЧЖОУ ТЕХНОЛОГИЯЛЫҚ УНИВЕРСИТЕТІНЕ ДОСТЫҚ САПАР: АКАДЕМИЯЛЫҚ ЫНТЫМАҚТАСТЫҚТЫҢ ЖАҢА ПЕРСПЕКТИВАЛАРЫ

Шерхан Мұртаза атындағы Халықаралық Тараз университетінің өкілдері Қытай Халық Республикасының Ланьчжоу технологиялық университетіне (Lanzhou University of Technology) достық сапармен барды.

Кездесу барысында тараптар екі университет арасындағы академиялық және ғылыми ынтымақтастықты дамытудың перспективалық бағыттарын талқылады. Негізгі назар студенттерге арналған қысқы және жазғы мектептерді ұйымдастыруға, академиялық ұтқырлықты кеңейтуге, ақпараттық технологиялар саласындағы өзара іс-қимылға, сондай-ақ бірлескен және қос дипломды білім беру бағдарламаларын әзірлеу мүмкіндіктеріне аударылды.

Жамбыл облысының индустриялық әлеуетінің артуы және жаңа өндірістердің іске қосылуы жағдайында инженерлік-техникалық кадрларға деген перспективалық сұраныс та назарға алынды. Осыған байланысты Ланьчжоу технологиялық университетінің инженерлік білім мен қолданбалы зерттеулер саласындағы тәжірибесін пайдалана отырып, университетте техникалық бағыттарды кезең-кезеңімен дамыту мүмкіндіктерін зерделеу ұсынылды.

Тараптар өзара қызығушылық танытқан бағыттарды нақтылап, білім беру бағдарламаларының үйлесімділігін қарастыру және ынтымақтастықтың практикалық тетіктерін айқындау бойынша жұмысты жалғастыруға ниет білдірді.

Достық сапар университеттер арасындағы академиялық диалогты нығайтып, білім, ғылым және инновация салаларындағы ұзақ мерзімді әріптестіктің жаңа мүмкіндіктерін айқындауға негіз болды.