«Алтын шаңырақ» студенттердің кіші Ассамблеясы ашылды

Шерхан Мұртаза атындағы Халықаралық Тараз университетінде студенттік бірлік пен достықтың символына айналар «Алтын шаңырақ» студенттердің кіші Ассамблеясының ашылу салтанаты өтті. Бұл бастама – жастар арасындағы этносаралық келісім мен бірлікті нығайтуға бағытталған маңызды қадам.

Ашылу рәсімінде университет ректоры Махметғали Сарыбеков алғы сөз сөйлеп, студенттік Ассамблеяның қоғамдағы тұрақтылықты сақтаудағы маңыздылығын атап өтті.

– Қазақстан – бейбітшілік пен келісімнің алтын бесігі. Біз әрдайым этносаралық татулық пен достықты жоғары қоямыз. Университет қабырғасында ашылған «Алтын шаңырақ» студенттердің кіші Ассамблеясы – жас ұрпақтың бірлігін нығайтатын алаң болмақ. Бұл ұйым студенттерді толеранттылыққа, қоғамдық келісім мен патриотизмге баулиды, – деді ректор өз сөзінде.

Сондай-ақ, шара барысында Жамбыл облысы әкімдігінің ақпарат және қоғамдық даму басқармасының «Қоғамдық келісім» КММ басшысы Мубарак Жинақбаева сөз алып, Ассамблея жұмысының жастарға тигізер пайдасына тоқталды.

– Жамбыл облысы – түрлі этностардың татулықта өмір сүріп жатқан мекені. Бүгінгі студенттік Ассамблея – осы тұрақтылық пен бірлікті одан әрі нығайтудың жарқын көрінісі. Студент жастар үшін мұндай ұйымның ашылуы өзара түсіністік пен ынтымақтастықтың жаңа деңгейін қалыптастырады, – деді ол.

Салтанатты жиында сөз алған «Ассамблея жастары» Республикалық қоғамдық бірлестігі төрағасының орынбасары, Жамбыл облыстық «Ассамблея жастары» қоғамдық бірлестігінің төрайымы Хамида Турдыева ұйымның негізгі мақсаты жастарды қоғамдық келісім мен бірлік идеясына ұйыстыру екенін атап өтті.

– Қазақстан халқы Ассамблеясы қоғамдағы тұрақтылықтың кепілі болып табылады. Студенттік Ассамблея осы миссияны жалғастырып, жас ұрпақты ортақ құндылықтарға тәрбиелейтін алаңға айналады деп сенеміз, – деді ол.

Ал жаңадан құрылған «Алтын шаңырақ» студенттердің кіші Ассамблеясының төрағасы, «Экономика және бизнес» факультетінің «Мемлекеттік және жергілікті басқару» мамандығының 1-курс студенті Аяна Ким студенттерге сенім білдіргені үшін алғысын жеткізіп, ұйымның алдағы жоспарларымен бөлісті.

– Бұл – студенттер үшін үлкен мүмкіндік. Біз ұлттық бірлік пен достықты нығайту мақсатында түрлі мәдени-танымдық іс-шаралар өткізуді жоспарлап отырмыз. Университет жастарының қоғамдық белсенділігін арттырып, ел болашағына үлес қосуына жағдай жасаймыз, – деді ол.

Шара соңында қатысушылар жаңа бастаманың сәтті жүзеге асуына тілектестіктерін білдіріп, студенттік Ассамблеяның жемісті жұмыс істеуіне сенім білдірді.