Ғалым мұрасы – ұрпаққа аманат

Бүгін Шерхан Мұртаза атындағы Халықаралық Тараз университетінің ұйымдастыруымен көрнекті ғалым, түркітанушы, филология ғылымдарының докторы, жазушы Әуелбек Қоңыратбаевтың 120 жылдығына арналған республикалық ғылыми-әдістемелік конференция өтті. «Қазақстанның білім беру жүйесіндегі заманауи үрдістер: қазіргі зерттелуі мен дамуындағы негізгі тенденциялар» тақырыбындағы жиынға еліміздің беделді ғалымдары, жазушылар, жоғары оқу орындарының оқытушылары мен студенттері қатысты.

Конференцияны Шерхан Мұртаза атындағы Халықаралық Тараз университетінің ректоры, педагогика ғылымдарының докторы, профессор Махметғали Сарыбеков ашып, ғалымның қазақ әдебиеті мен түркітану ғылымына қосқан үлесі туралы баяндады.

– Әуелбек Қоңыратбаев – қазақ әдебиеті тарихын дәуірлеу, ежелгі дәуір әдебиетін зерттеу ісінде зор еңбек сіңірген ғалым. Оның еңбектері тек өткен ғасырдың мұрасы ғана емес, бүгінгі күннің де темірқазығы, – деді университет басшысы.

Ғылыми жиынға арнайы шақырылған қонақтар арасында М.О.Әуезов атындағы Әдебиет және өнер институтының бас ғылыми қызметкері, ҚР Еңбек сіңірген қайраткері, филология ғылымдарының докторы, жазушы Нұрдәулет Ақыш, С.Демирель университетінің профессор-ассистенті Баян Керімбекова, М.Х.Дулати атындағы Тараз университетінің доценті Темірбай Мұқашев сынды танымал ғалымдар болды.

Конференция барысында ғалымның ғылыми мұрасы жан-жақты талқыланды. Нұрдәулет Ақыш «Ә.Қоңыратбаевтың тосын пайымдауларындағы трансформация» тақырыбында баяндама жасап, оның әдебиеттанудағы жаңашыл көзқарастары туралы ой қозғады.

Сондай-ақ, Баян Керімбекова ғалымның әдебиетті оқытуға қатысты еңбектерін бүгінгі білім беру жүйесімен байланыстыра зерттеу қажеттігін алға тартса, Ақбота Абиыр халық ауыз әдебиетін оқытудағы Қоңыратбаев ұстанымын талдады.

Конференцияға жас зерттеушілер де белсене қатысты. Шерхан Мұртаза атындағы Халықаралық Тараз университетінің магистранты, педагог-зерттеуші Айнұр Омарова «Ә.Қоңыратбаев шығармашылығы және оқыту мәселелері» тақырыбында баяндама жасап, ғалымның білім беру саласына қосқан үлесін саралады.

Жас шерхантанушылар клубының мүшесі, университеттің 3-курс студенті Рабиға Чкал да сөз алып, Әуелбек Қоңыратбаевтың әдебиет тарихын зерттеудегі еңбектері жөнінде өз ойымен бөлісті.

Жиын соңында қатысушылар ғалым мұрасын зерттеу мен насихаттау бағытындағы бастамалар жалғасын табатынын атап өтті.

– Ұлы тұлғалар мұрасы – ұлттың алтын қазынасы. Қоңыратбаев еңбектерін бүгінгі жас ұрпаққа таныстыру – біздің міндетіміз, – деді қорытынды сөзінде ұйымдастырушылар.

Конференция соңында қатысушылар естелік суретке түсіп, болашақта ғылыми мұраны одан әрі зерттеу мен дамыту жөнінде пікір алмасты.